काठमाडौं– अल्पसङ्ख्यकहरूलाई लक्षित गरी पछिल्लो समय आक्रमणहरू हुन थालेपछि अफगानिस्तानको शासन चलाइरहेको तालिबानले चर्को आलोचना खेप्न थालेको छ ।

गत वर्षको अगष्ट महिनामा अफगानिस्तानको सत्ता कब्जा गर्ने बेला तालिबानले अल्पसङ्ख्यकहरूको सुरक्षा गर्ने बाचा गरेको थियो । यद्यपि पछिल्लो समय अल्पसङ्ख्यकहरूलाई लक्षित गरी आक्रमणहरू बढ्दै जाँदा तालिबान उक्त वाचाप्रति उदासिन देखिएको फ्रन्टियर पोष्टले जनाएको छ ।

पछिल्ला केही सातामा अफगानिस्तानमा भएका आतंककारी आक्रमणमा केटाकेटीसहित ७७ जनाभन्दा धेरैको मृत्यु भएको छ । यस्ता आतंककारी आक्रमणले उसैपनि आर्थिक एवम् मानवीय संकट झेलिरहेको अफगानिस्तानलाई अझ अस्थिर बनाउने चिन्ता उत्पन्न भएको फ्रन्टियर पोष्टको टिप्पणी छ ।

पछिल्ला केही सातामा खासगरी धार्मिक एवम् साम्प्रदायिक अल्पसङ्ख्यकहरूको बाक्लो बस्ती रहेको इलाकामा विद्यालय, मस्जिद, खुला बजारजस्ता सार्वजनिक क्षेत्रलाई लक्षित गरी आक्रमण हुँदै आएका छन् ।

पछिल्ला आक्रमणहरूबाट या त अफगानिस्तानको सुरक्षा अवस्थामा तालिबानको नियन्त्रण नै नभएको वा अल्पसङ्ख्यकबारे तालिबानको उदासिनता देखिएको उक्त अखबारको टिप्पणी छ ।