काठमाडौं– कार्यालय समयमा मात्र होइन कतिपय दिन बिहान, दिउँसो र बेलुका पनि सार्वजनिक यातायातमा यात्रुलाई सिट पाउन मुस्किल पर्छ । सवारी चढ्नकै लागि लामो समयसम्म लाइन बस्नुपर्ने बाध्यता धेरैका छन् ।

यही समस्या समाधानार्थ महानगरले यात्रु र बस सञ्चालक दुबैका लागि विभिन्न नियमहरु बनाएको छ । कहाँ चढ्ने ?, कहाँ रोक्ने ? कति सिट कुन यात्रुलाई ? लगायत छन् । यति हुँदा हुँदै पनि यात्रु झुण्डिएर यात्रा गर्नुपर्ने बाध्य हटेको छैन ।

यात्रुको चापलाई मध्यनजर गर्दै काठमाडौं महानगरपालिकाले २० वटा साझा यातायात थपेपनि सञ्चालनमा आउन सकेका छैनन् । ५ करोड लगानी गरेर सो बसहरु डेढ महिना अघि काठमाडौं ल्याइएका हुन् । महानगरले जेठको अन्तिम साताबाट साझा यातायात सडकमा गुडाउने तयारी गरेको भएपनि रुट तय नहुँदा कार्यलयमै थन्क्याइएका छन् ।

कुन रुटमा सञ्चालन गर्ने भन्ने कुरा निष्कर्षमा नपुग्दा सञ्चालनमा ढिलाई भएको साझा यातायातका सिइओ महेन्द्रराज पाण्डेले जानकारी दिए ।
‘बसको प्राविधिक परीक्षण भइरहेको र केही नयाँ रुट दर्ता गर्ने कार्य भइरहेको छ ।’ सीइओ पाण्डेले भने ‘सम्भवतः असारको पहिलो साताबाट २० वटै बस सञ्चालनमा आउनेछन् ।’

कार्यलयमा यस अघि साझा यातायात ५१ वटा थिए । महानगरले २० वटा बस थपेसँगै ७१ वटा पुगेका छन् । हाल साझाका ६ वटा बसले राजधानी बाहिर सेवा दिइरहेका छन् । साथै बाँकी बसले भने उपत्यकाका तीनै जिल्लामा सुविधा दिइरहेका छन् ।

सञ्चालनमा रहेका ५१ वटा साझा यातायात बस उपत्यकाका विभिन्न स्थानमा पुग्ने गरेको बताउँदै पाण्डे भन्छन्, ‘सूर्यविनायक—स्वयम्भू, पनौती—रत्नपार्क, धुलिखेल—रत्नपार्क, लगनखेल—नयाँ बसपार्क र लगनखेल—बुढानिलकण्ठ रुटमा पर्ने यात्रुलाई यी बसहरुले सेवा दिइरहेका छन् ।’

कस्ता बस आइपुगे ?

साझाले यसअघि सञ्चालन गरेका ५१ वटा बसहरु ‘युरो–३’ मापदण्डका रहेका थिए । तर अहिले आएका २० बस भने ‘युरो–४’ मापदण्डको रहेको पाण्डेले बताए ।

‘युरो–४ मापदण्डका यी गाडी ४० भन्दा धेरै सिट क्षमता छन्’ खबरहबसँगको कुराकानीमा उनले भने ‘पहिलेको भन्दा साइज छोटो देखिन्छ, तर क्षमता उस्तै हो’ । अपांगमैत्री यी बसमा अहिलेको जस्तै एलइडी टिभी, सिसी क्यामेरा, उभिएका यात्रुलाई समात्न मिल्ने ह्याङगर लगायतका सुविधा रहेका छन् ।

महानगर क्षेत्रभित्र सञ्चालन भइरहेका सवारी साधनमध्ये टिकट लागू गर्ने पहिलो यातायात साझाले गाडी चढ्दा यात्रुलाई अनिवार्य टिकट लिनुपर्ने उनको भनाइ छ ।