सिलगढी– भूस्वर्गका रुपमा चिचिने सुदूरपश्चिमको प्रमुख पर्यटकीयस्थल खप्तडमा गंगा दशहरा मेला शुरु भएको छ । प्रत्येक वर्षको जेठ महिनामा खप्तडामा गंगा दशहरा मेला लाग्ने गर्छ ।

मेला भर्नका लागि स्वेदश तथा विदेशबाट हजारौं तीर्थालु तथा पर्यटकहरु खप्तड पुग्ने गर्छन् । खप्तडमा मंगलबार राति विशेष मेला लाग्ने जनाइएको छ । खप्तड मेलाअन्तर्गत मंगलबार राति देउडा खेल्ने तथा बुधबार विहान पूजाआजा हुने छ ।

दशहरा मेलाको अवसर पारेर डोटी उद्योग वाणिज्य संघले यस वर्ष पनि पुरुष भलिबल प्रतियोगिता, घोडा दौड र देउडा प्रतियोगिता पनि आयोजना गरेको छ ।

गंगा दशहरा मेलाका दिन खप्तडको त्रिवेणी धाममा नुहाउँदा पाप नाश हुने विश्वास गरिन्छ । यस्तै, पितृलाई तर्पण दिँदा पितृले मुक्ति पाउने र स्वर्ग जाने भन्ने विश्वासका कारण यो मेलाको समयमा वृद्धवृद्धादेखि बालबालिकालगायत अन्य युवाहरुको पनि बढी भीड लाग्ने गर्छ ।