काठमाडौं– पछिल्लो समय पाकिस्तानको कराँचीमा अपराधका घटना बढ्दै गएको देखिएको छ । पाकिस्तानको आर्थिक केन्द्र मानिने कराँची शहरमा बालिकाहरु अपहरणमा पर्ने घटना बढ्दै गएको पाकिस्तानबाट प्रकाशित हुने डन अखबारको अनलाइन संस्करणले जनाएको छ ।

केही समय कराँचीबाट १४ वर्षे बालिका अपहरणमा परेकी थिइन् । त्यसको केही दिनलगत्तै कराँचीको साउदावाद क्षेत्रबाट अर्की बालिका पनि अपहरणमा परेको डनले जनाएको छ ।

अज्ञात अपहरणकारी विरुद्ध बालिकाको परिवारले प्रहरीसमक्ष उजुरी दिएका छन् । शहरका प्रहरी प्रमुख गुलाम नबी मेमनले अपहरित बालिकाको खोजीकार्यका लागि प्रहरीको तीन टोली परिचालन गरिएको जानकारी दिएको डनले जनाएको छ ।

यसअघि पनि फोहोर फाल्न घरबाट निस्केकी अर्की बालिका पनि अपहरणमा परेकी थिइन् ।

पछिल्लो समय पाकिस्तानमा लैङ्गिक असमानता बढ्दै गएको बताइन्छ । गत वर्ष सन् २०२१ को विश्व लैङ्गिक असमानता सूचकांकमा पाकिस्तान १५६ मुलुकहरुमध्ये १५३ औं स्थानमा परेको थियो ।