काठमाडौँ – नेपाली कांग्रेसका नेता एवं पूर्वमन्त्री अफताब आलमविरुद्धको मुद्दामा आज सुनुवाइ हुँदै छ ।

विस्फोटक पदार्थ बमसमेतको प्रयोग गरी ज्यान मारेको सम्बन्धी ‘हेर्दाहेर्दै’मा रहेको मुद्दाको सुनुवाइका लागि न्यायाधीशहरू सुष्मालता माथेमा र नहकुल सुवेदीको संयुक्त इजलासमा मुद्दाको पेसी तोकिएको छ ।

यसअघि पटक पटक पेसी तोकिए पनि सुनुवाइ हुन सकेको छैन । मुद्दा सात पटक स्थगित, पाँच पटक हेर्न नमिल्ने र चार पटक हेर्न नभ्याइने राखिएको थियो।

जिल्ला अदालत रौतहटले पुर्पक्षका लागि थुनामा राख्न दिएको आदेश उच्च अदालत वीरगंजले सदर गरेपछि आलमले सर्वोच्चमा २०७७ मंसिर १२ गते फैसला बदरको माग गर्दै निवेदन दिएका थिए ।

२०६४ चैत २७ गते आतंक फैलाएर निर्वाचन जित्ने उदेश्यले भारतदेखि पेसेवर बम बनाउनेहरू ल्याएको र बम बनाउने क्रममा विस्फोट हुँदा घाइते भएकाहरूलाई ज्युँदै इँटाभट्टामा हालेर हत्या गरेको अभियोग उनीमाथि छ ।