काठमाडौं- राष्ट्रिय फुटबल टोलीका खेलाडीहरुले मुख्य प्रशिक्षक अब्दुल्लाह अल्मुताइरीले एकपक्षीय रुपमा क्याम्प छोड्न निर्देशन दिएसँगै आफूहरू क्याम्पबाट निस्किएको स्पष्टीकरण दिएका छन् ।

काठमाडौँमा बिहीबार आयोजित पत्रकार सम्मेलनमा खेलाडीहरुले निरन्तर क्याम्प छोड्न दबाब आएको पनि बताए । दबाबबीच निरह भई सबै जना होटेलबाट निस्केको तर विद्रोह भने नगरेको उनीहरुले बताए ।

प्रशिक्षक अल्मुताइरीसँग भएको विवादलाई आफूहरुले अखिल नेपाल फुटबल संघ एन्फामा राखेको तर त्यसलाई गलत ढंगमा प्रस्तुत गरिएको पनि खेलाडीहरुको गुनासो छ ।

साथै एन्फाको बन्द प्रशिक्षणका क्रममा होस्टेलमा व्यवस्थापन कमजोर रहेको पनि उनीहरुले बताए । यस्तै खेलाडीहरुको प्रतिनिधित्व गर्ने मिडफिल्डर रोहित चन्दलाई एकपक्षीय रुपमा स्पष्टीकरण बिनै क्याम्पबाट निकालिएको उनीहरुको भनाइ छ ।

पत्रकार सम्मेलनका क्रममा प्रशिक्षक अल्मुताइरीले खेलाडीको मैदान बाहिरको जीवनलाई लिएर पनि कारबाही गर्ने किसिमको प्रवृत्ति देखाएको उनीहरूले आरोप लगाए ।

उनीहरूले आफूहरु देशको लागि विभिन्न त्याग गरी खेल्दै आएको तथा प्रशिक्षक र आफूहरुबीच भएको तीतो पनलाई सही तरिकाले समाधान गर्न पनि एन्फालाई आग्रह गरेका छन् ।

रोहित चन्दको क्याम्पबाट निस्किएसँगै मंगलबार ९ खेलाडी बन्द प्रशिक्षणबाट एन्फालाई कुनै जानकारी नदिई होटलबाट निस्किएको घटनाबारे स्पष्टीकरण दिन खेलाडीहरुले पत्रकार सम्मेलन गरेका हुन् ।