एजेन्सी– फ्रान्समा येल्लो भेष्ट प्रदर्शन १३ औँ सातामा जारी छ । गत नोभेम्बरयता जारी प्रदर्शनका क्रममा येल्लो भेष्ट प्रदर्शनकारीले यो साताको शनिबार पनि राजधानी पेरिससहित मुलुकका विभिन्न शहरमा प्रदर्शन गरे ।

पछिल्लो प्रदर्शन पनि अन्य साताकोजस्तै हिंसात्मक भएको छ । प्रदर्शनकारीले प्रहरीको भ्यान र अन्य सवारी साधनमा आगजनी गरेको तथा पसलमा तोडफोड गरेको प्रहरीले जनाएको छ । प्रहरीले प्रदर्शनलाई नियन्त्रण गर्न अश्रुग्याँस, पानीको फोहोरा र रबरको गोली चलाएको जनाइएको छ ।

पछिल्लो प्रदर्शनमा १२ हजार प्रदर्शनकारी सहभागी रहेको फ्रान्सका आन्तरिक मामिला मन्त्रालयले जनाएपनि प्रदर्शनकारीको वास्तविक सङ्ख्या २० हजारभन्दा धेरै रहेको अन्तर्राष्ट्रिय सञ्चारमाध्यमले जनाएका छन् ।

राष्ट्रपति इम्मानुएल म्याक्रोंको सरकारले प्राकृतिक तेल र ग्याँसमा कर बढाउने निर्णय गरेपछि सुरु भएको प्रदर्शन पछिल्ला केही महिनायता आएर सामाजिक असन्तुलन र जनजीविकाका विषयमा समेत केन्द्रित हुने गरेको छ । उनीहरुले राष्ट्रपति म्याक्रोंको राजीनामा समेत माग्ने गरेका छन् ।