काठमाडौं– चीनको सिन्जियाङ प्रान्तमा एकै गाउँबाट १ सय जनालाई कैद गरिएको खुलासा भएको छ ।

स्थानीय सुरक्षा गार्डलाई उद्धृत गर्दै रेडियो फ्रि एसियाले जनाएअनुसार सिन्जियाङ प्रान्तको गुल्जा काउन्टीस्थित शेख मेहले गाउँका १ सय जना उइगुर  मुसलमान अल्पसंख्यकलाई कैद गरिएको हो ।

यद्यपि उनीहरुलाई कैद गर्नुको कारण भने नखुलाइएको जनाइएको छ । उक्त गाउँको जनसंख्या केबल ७ सय छ । यसअनुसार त्यस गाउँका १४ प्रतिशत जनसंख्या कैदमा छन् ।

यद्यपि सोही क्षेत्रबाट विदेश पलायन भएका केही उइगुरहरुले भने चिनियाँ कैदमा रहेका गाउँलेको संख्या २ सय सम्म हुनसक्ने बताएका छन् ।

रेडियो फ्रि एसियाका अनुसार एकजना उइगुरले आफ्ना तीन दाजुभाइ चिनियाँ कैदभित्र थुनिएको बताए । उनले बताएअनुसार गाउँका हरेक घरबाट एक देखि ५ जनालाई कैद गरिएको छ ।

सन् २०१७ यता चीनका बन्दी शिविरहरूमा १८ लाख भन्दा धेरै उइगुर तथा अन्य अल्पसंख्यकहरु बन्दी बनाइएको बताइन्छ ।