काठमाडौँ– नेपाली कांग्रेसका उपसभापति धनराज गुरुङले पार्टीमा वैचारिक धरातललाई बिर्सिएर प्राविधिक रूपमा अगाडि बढ्ने काम भएको टिप्पणी गरेका छन् ।

बुधबार काठमाडौँमा नेपाल विद्यार्थी संघको ५३ औँ स्थापना दिवसको अवसर पारेर गरिएको ‘स्थानीय निर्वाचनमा नेविसंघको भूमिका र पार्टीको दायित्व’ विषयक गोष्ठीमा उपसभापति गुरुङले यस्तो बताएका हुन् ।

‘वैचारिक धरातललाई बिर्सिएर प्राविधिक रूपमा अगाडि बढी रह्यो भने दुर्घटनातर्फ उन्मुख हुन सक्छ,’ गुरुङले भने, ‘आजका दिनमा गम्भीर हुन आवश्यक छ । वैचारिक स्खलन आयो भने राजनीतिक पार्टीहरू बाँच्न सक्दैन ।’
उनले नेपाली कांग्रेसको आत्मा बचाउन नेपाल विद्यार्थी संघ खोज्न आवश्यक रहेको पनि बताए ।

गुरुङले भने, ‘कांग्रेसको आत्मा बचाउनका लागि आजको मितिमा धामीझाँक्री खोज्दै हिँड्ने होइन, नेपाल विद्यार्थी संघ खोज्न आवश्यक छ ।’

उनले स्थानीय तहको निर्वाचनमा गठबन्धन गरिएकोप्रति पनि टिप्पणी गरेका छन् ।

‘पूरै सदस्य घरभित्र राखेर खेतमा खनजोत गर्ने खेतालाहरू बाहिर खोज्न भौतारिरहेको म कांग्रेस हुँ । यस्तो कांग्रेस भएको छु म आज,’ उनले भने, ‘घरभित्रै हुर्किएका जवान छोराछोरीहरू, बुहारीहरूलाई घरमै थन्क्याएर बाहिर खेताला खोज्नेको हबिगत के हुन्छ, प्रष्टै छ ।’