काठमाडौं– ईश्वरको निन्दा गरेको भन्दै गत वर्ष एक श्रीलंकाली नागरिकलाई कुटेर मार्ने ६ जनालाई पाकिस्तानको अदालतले मृत्युदण्डको सजाय सुनाएको छ । पाकिस्तानको लाहौर शहरमा रहेको प्रतिआतंकवाद अदालतले उनीहरुलाई श्रीलंकाली नागरिक प्रियन्था कुमारा दियावदनाको हत्या गरेको अभियोगमा मृत्युदण्ड सुनाएको हो ।

यीबाहेक घटनामा संलग्न नौ जनालाई जन्मकैद र एक जनालाई ५ वर्षको र अरु ७२ जनालाई दुई वर्ष जेल सजाय सुनाइएको बताइएको छ । सजाय पाउनेमध्ये आठ जना नाबालिग रहेको अल जजिराले जनाएको छ ।

‘अदालतमा यो मुद्धा पु¥याउन र यो फैसलासम्म पुग्नका लागि अभियोजनपक्षले निकै मिहिनेत गरेको छ ।’ सार्वजनिक अभियोजनकर्ता अब्दुल रउफ वाटूलाई उद्धृत गर्दै समाचार संस्था एएफपीले जनाएको छ ।

४८ वर्षे दियावदनाको गत वर्षको डिसेम्बर महिनामा सियालकोट शहरमा ईश्वरको निन्दा गरेको भन्दै आक्रोशित मानिसहरुको भीडले कुटेर हत्या गरेका थिए । हत्यापश्चात उनको शवलाई जलाइएको थियो । भीडमा रहेका केही मानिसहरुले जलेको शवसँग सेल्फी खिचाएको समेत बीबीसीले जनाएको छ ।

सियालकोटको एक कारखानामा म्यानेजर रहेका दियावदनाले इस्लाम धर्मका पैगम्बर मोहम्मदको नाम लेखेको पोष्टर च्यातेको भन्दै आक्रोशित भीडले उनको हत्या गरेका थिए । यता उनीसँगै काम गर्ने सहकर्मीले भने भवनलाई सफा गर्ने बेला भएका कारण उनले उक्त पोष्टर च्यातेको बताएका छन् ।

यस घटनाले पाकिस्तानभर आक्रोश पैदा गरेको थियो । घटनापछि तत्कालिन पाकिस्तानी प्रधानमन्त्री इमरान खानले यसलाई ‘लज्जाको दिन’ भनी टिप्पणी गरेका थिए ।

बहुसंख्यक इस्लाम धर्मावलम्बीको बसोबास रहेको पाकिस्तानमा ईश्वर निन्दाको विषय निकै संवेदनशील मानिन्छ ।