काठमाडौँ– अर्थ मन्त्रालयले सरकारी निकाय तथा सार्वजनिक संघसंस्थाहरूलाई इन्धनको खपत २० प्रतिशतले कटौती गर्न निर्देशन दिएको छ ।

मन्त्रालयले सोमबार सूचना जारी गरी विभिन्न मन्त्रालय तथा निकाय तथा सार्वजनिक संघसंस्थालाई इन्धनको खपत २० प्रतिशतले कटौती गर्न निर्देशन दिएको हो ।

मन्त्रालयले यी निकायहरूलाई चालु आर्थिक वर्षमा बाँकी रहेको इन्धनसम्बन्धी बजेटमा २० प्रतिशतले कटौती गर्न भनेको छ ।

यद्यपि, यो निर्णय विकास आयोजनाहरू, शान्ति सुरक्षा, अत्यावश्यक सेवा र आसन्न स्थानीय तह निर्वाचन प्रयोजनका लागि लागु नहुने पनि मन्त्रालयले जनाएको छ ।

यो कटौती हाललाई २०७९ असार मसान्तसम्म लागु रहने छ ।

निर्णय पालनको अनुगमन केन्द्रीय निकायहरू, सवै संवैधानिक निकायहरू र प्रदेशको हकमा प्रधानमन्त्री तथा तथा मन्त्रिपरिषद्को कार्यालय र स्थानीय तहको हकमा संघीय मामिला तथा सामान्य प्रशासन मन्त्रालयबाट गरिने छ ।