काठमाडौँ– अभिनेत्री प्रियंका कार्की कुनै समय निर्माता र निर्देशकको रोजाइमा पर्ने नायिकाहरूमा अगाडि आउने नाम थिइन् ।

उनले गर्ने अभिनयसँगै फिल्ममा लिँदा सहज हुने भएकाले निर्माता तथा निर्देशकले कास्ट गर्थे । उनले फिल्मलाई दिने समय र प्रचारप्रसारमा दिने समयले मिडियामा समेत चर्चा पाउथ्यो ।

यद्यपि अहिले अवस्था फेरिएको छ । केही समयअघि मात्र रिलिज भएको फिल्म ‘हेल्लो जिन्दगी’ मा उनी थिइन् ।

प्रियंका फिल्ममा रहेको जानकारी निर्माण पक्षले दिएता पनि उनले दिइनन् । उनीसँगै दीपिका प्रसाईंले पनि प्रमोशनमा साथ् दिइनन् ।

प्रियका हालै आमा बनेकाले पनि समय दिन नसकेको चर्चा पनि भयो ।

यद्यपि त्यसपछि एक म्युजिक भिडियोका लागि प्रियंका अगाडि आइन । फिल्मको बारेमा नबोलेकी प्रियंका म्युजिक भिडियोको प्रचारमा अगाडि आएपछि ‘हेल्लो जिन्दगी’ निर्देशक एभरेष्ट सूर्य बोहोराले दुखेसोसमेत पोखेका थिए ।

फिल्मको प्रचारमा दिनरात नभनी लाग्ने प्रियंकालाई अहिले व्यानरअनुसार व्यवहार गर्ने आरोप लाग्ने गरेको छ । ‘हेल्लो जिन्दगी’ मा नदेखिएकी प्रियंका ‘लक्का जवान’ को प्रचारमा जोडिएकी छन् ।

कलाकार आफ्नो फिल्मको प्रचारप्रसारमा जोडिनु राम्रो हो । तर, आफ्नै फिल्मलाई वास्ता नगर्ने शैली भने राम्रो नभएको निर्माण पक्षको भनाइ छ । कुनै समय जुन गुणका कारण प्रियंका निर्माता तथा निर्देशकको ‘फेभरेट’ बन्ने गरेकी थिइन् । अहिले त्यही कारण निर्मातासँग उनको दूरी पनि बढेको चर्चा फिल्मनगरीमा चल्ने गरेको छ ।