भक्तपुर– भक्तपुरमा चलिरहेको बिस्का जात्राअन्तर्गत भेलुखेलको योसिंख्योमा ५५ हात लामो योसिं (लिङ्गो) ठड्याइएको छ ।

विस्का जात्रामा हरेक वर्ष नयाँ वर्षको अघिल्लो दिन ५५ हाते योसिं:द्‍योलाई योसिंख्योमा उभ्याउने गरिन्छ ।

तर मध्यरातिसम्म योसिं:द्‍योलाई ठड्याउन नसकेपछि बिहीबार ठड्याइएको हो ।

५५ हाते योसिं:द्‍योलाई आजै साँझ ढालिन्छ । अष्टमात्रिकाको प्रतीक मानिने लिङ्गो नागनागिनीको प्रतीकस्वरूप हंलिपतध्वजा बाँधेर फराइन्छ ।

त्यसको लगत्तै खलाँ टोलमा भैरवनाथ र भद्रकालिको रथलाई एक आपसमा जुधाउने परम्परा रहेको छ ।

जसलाई स्थानीय भाषामा द्यो ल्वाकिगु भनिन्छ । लिङगो उभ्याउने र ढाल्ने नै बिस्केट जात्राको प्रमुख पक्ष हो।

भैरवनाथको प्रतीक मानिने लिङ्गोको शीर्षभाग र हातहरू नौलो कपडाले बेरी लिङ्गोको कोखमा झुण्ड्याउने चलन छ ।

यी दुई वीरध्वजा र विश्वध्जालाई भैरवनाथको ध्वजासमेत भन्ने गरिन्छ ।

यी ध्वजाहरू फुकाएपछि एउटा सम्वत फेरिने हुनाले बीचैमा फुकाएर हेर्न हुँदैन भन्ने धार्मिक मान्यतासमेत रहेको पाइन्छ ।

लिङ्गो ठड्याउन बाँधिएका ८ वटा डोरीलाई अष्टमात्रिककको प्रतीक मानिन्छ ।