जनकपुरधाम– जनकपुरधामका लोकसेवा परीक्षा तयारीसम्बन्धी अभिमुखीकरण कार्यक्रम गरिएको छ ।

मधेशी आयोगले जनकपुरधाममा गरेको कार्यक्रममा सय जनाभन्दा बढी विद्यार्थी सहभागी भएका थिए ।

कार्यक्रममा मधेशी आयोगका अध्यक्ष डा. विजयकुमार दत्तले आयोगले हरसम्भव मधेशी समुदायका व्यक्तिहरूको सशक्तीकरणका लागि विभिन्न कार्यक्रम गर्दै आएको बताए ।

उनले आगामी दिनमा समेत स्रोत र साधनलाई पूर्ण उपयोग गरी अझ प्रभावकारी कार्यक्रमहरू गर्ने प्रतिबद्धता जनाए ।

त्यस्तै, मधेशी आयोगका सदस्य जिवछ साहले लोकसेवामा पहुँच बढाउनका लागि मधेश समुदायले पुरानो सोच त्याग्नुपर्ने बताए ।

लोकसेवा परीक्षामा आफूहरू नसक्ने सोच त्याग्नुपर्ने उनको भनाइ छ ।

कार्यक्रममा धनुषाका प्रमुख जिल्ला अधिकारी सुरेन्द्र पौडेल, आन्तरिक मामिला मन्त्रालयका सचिव रामकुमार महतो, पूर्व उपसचिव एवं शिक्षक उमेशलाल कर्ण, आयोगका सूचना अधिकारी रमेश दासलगायतले विद्यार्थीहरूलाई तयारीसम्बन्धी प्रशिक्षण दिएका थिए । विभिन्न विद्यालयका प्रधानाध्यापक तथा शिक्षकहरूको समेत उपस्थिति थियो ।