काठमाडौं– लण्डनमा निर्वासित जीवन बिताइरहेका पाकिस्तानका पूर्व प्रधानमन्त्री नवाज शरिफ पाकिस्तान फर्किने भएका छन् । पाकिस्तान मुस्लिम लिग नवाज पीएलएम–एन पार्टीका एकजना वरिष्ठ नेतालाई उद्धृत गर्दै पाकिस्तानी अखबार एक्सप्रेस ट्रिब्युनले जनाएअनुसार नवाज आगामी महिना इदपछि पाकिस्तान फर्किने छन् ।

यस वर्ष आगामी मे महिनाको पहिलो साता इद परेको जनाइएको छ । पीएलएम–एनका सांसद मियाँ जावेद लतिफका अनुसार तीनपटक पाकिस्तानको प्रधानमन्त्री रहिसकेका नवाजको पाकिस्तान फिर्तीबारे गठबन्धनसँग छलफल गरिनेछ ।

कान्छा भाइ शहबाज शरिफ नयाँ प्रधानमन्त्री बन्न लागेसँगै नवाजको पाकिस्तान फिर्तीबारे पीएलएम- एनका कार्यकर्ता र आम सर्वसाधारणमा ठूलो चासो रहेको बताइन्छ ।

उनीमाथि पाकिस्तानमा विभिन्न भ्रष्टाचार र आर्थिक हिनामिनाका विषयमा अनुसन्धान भइरहेको छ भने उनीविरुद्धका धेरै मुद्दाहरू अदालतमा विचाराधीन रहेको पाकिस्तानी सञ्चारमाध्यमले जनाएका छन् ।

सन् २०१९ मा सर्वोच्च अदालतले पानामा पेपर्स काण्डमा नवाजलाई दोषी ठहर गरेपछि ७२ वर्षे उनको राजनीतिक भविष्य सकिएको आँकलन गरिएको थियो ।

लाहोर उच्च अदालतको अनुमतिमा विदेशमा उपचार गराउन भन्दै उनी सन् २०१९ नोभेम्बर महिनामा लण्डन गएका थिए । त्यसयता उनी पाकिस्तान फर्केका छैनन् ।