कास्की– हिन्दू अभियानीहरूले नेपाल स्वयंसिद्ध हिन्दू राष्ट्र रहेको बताएका छन् ।

शनिबार पोखरामा हिन्दू राष्ट्र स्वाभिमान जागरण अभियालने गरेको ‘प्रबृद्ध नागरिक गोष्ठी एवम् साहित्य परिचय कार्यक्रम’ मा सहभागीहरूले यस्तो बताएका हुन् ।
उनीहरूले इतिहास, संस्कृति, परम्परा र जनसङ्ख्याका आधारमा नेपाल स्वयंसिद्ध हिन्दू राष्ट्र नै रहेको बताएका छन् ।

अभियानका राष्ट्रिय संयोजक तथा पूर्वप्रधानसेनापति रुक्माङ्गद कटवालले हिन्दू राष्ट्र स्वाभिमान जागरण अभियान नेपाल र नेपालीको अस्तित्वसँग गासिएको बताए ।
अस्वस्थताका कारण प्रत्यक्ष उपस्थित नभएका कटवालले कवितासमेत वाचन गरी शुभकामना सन्देश दिएका थिए ।

उनले यस अभियानलाई राजनीतिसँग कुनै सरोकार नरहेको भन्दै चन्द्र सूर्य रहेसम्म नेपालको अस्तित्व कायम रहिरहोस् भन्ने एक मात्र उद्देश्य लिएर अगाडि बढेको बताए ।

गोष्ठीमा पूर्वप्रधानन्यायाधीश गोपाल पराजुलीले धर्मको रक्षाका लागि हिन्दूहरू स्वयम् लाग्नुपर्ने बताए ।

उनले धर्मनिरपेक्षताले हिन्दू समाजलाई विभाजन गरेको पनि दाबी गरे ।

पूर्वप्रधानन्यायाधीश पराजुलीले बन्धुत्वको भावना समेट्ने हिन्दू धर्मलाई आधार मानेर नेपाललाई हिन्दू राष्ट्रको पहिचानका रूपमा विकास गर्न सुझाव दिएका थिए ।

कार्यक्रममा अभियानका केन्द्रीय सदस्य तथा नेपाल प्रहरीका पूर्वप्रहरीमहानिरीक्षक कल्याण तिम्सिनाले नेपालको अस्तित्वसँग जोडिएकाले हिन्दूहरूलाई संगठित,

जागरूक र सचेत बनाउँदै देशलाई पुनः हिन्दू राष्ट्र बनाउन अभियान सुरु भएको बताए ।

गोष्ठीमा लिलाभक्त अर्याल, सावित्री शर्मा पौडेल, सुशीलकुमार गोशलीलगायत सहभागी भएका थिए ।

गोष्ठीमा अभियानद्वारा हालसम्म प्रकाशित साहित्यबारे जानकारी गराइएको थियो ।