काठमाडौं- श्रीलंकाका राष्ट्रपति गोताबाया राजपाक्षेले देशको आर्थिक सङ्कट निवारणका लागि सल्लाहकार समूह गठन गरेका छन् । देशमा आर्थिक सङ्कट टार्न तत्काल गर्नु पर्ने र दीर्घकालको लागि गर्नुपर्ने काम तथा निर्णयका बारेमा सल्लाह लिन समूह गठन गरिएको राष्ट्रपतिको कार्यालयले जनाएको छ ।

सल्लाहकार समूहसँग उनले निरन्तर छलफल गर्दै सरकारी कदम अगाडि बढाउने अधिकारीहरूले जनाएका छन् । उनले गठन गरेको सल्लाहकार समूहमा श्रीलंकाको केन्द्रीय बैंकका पूर्व गभर्नर इन्द्रजित कुमारास्वामी, विश्व बैंकका पूर्व प्रमुख अर्थशास्त्री शान्त देवराजनलगायतका अर्थविद्हरू रहेको बताइएको छ ।

सल्लाहकार समूहले विश्व मुद्रा कोषसँग पनि सहयोग र सहकार्यका लागि निरन्तर पहल गर्ने जिम्मेवारी पाएको चिनियाँ समाचार संस्था सिन्ह्वाले जनाएको छ ।

चर्को आर्थिक संकट एवम् अत्यावश्यक वस्तुको अभाव खेपिरहेको श्रीलंकामा सरकारविरुद्ध प्रदर्शन चर्किरहेका बेला राष्ट्रपति राजपाक्षेले सल्लाहकार समूह गठन गरेका हुन् ।