काठमाडौँ – अभिनेता अनमोल केसीले फिल्मको ट्रेलरमा मेकर्सले सबै पक्ष नसमेट्ने बताएका छन् ।

‘ट्रेलरले फिल्मको झल्को दिन्छ नै तर त्यसकै आधारमा धेरै धारणा बनाउनु हुन्न किनकि ट्रेलर त झलक मात्र हो, फिल्म त बाँकी नै हुन्छ’, अनमोलले भने ।

प्रदर्शनको क्रममा रहेको फिल्म ‘ए मेरो हजुर ४’ को बारेमा कुराकानी गर्दै अनमोलले आफू कलाकारको रूपमा थोरै भए पनि इभल्भ महसुस गरेको बताए । ‘कथा नयाँ नभएता पनि त्यसलाई प्रस्तुत गर्ने शैली नयाँ छ । जसरी कथालाई प्याकेजिङ गरिएको छ, त्यसले यो फिल्मलाई इन्टरटेनिङ बनाएको छ,’ उनले भनेका छन् ।

अनमोलले यस फिल्ममार्फत अभिनयमा केही भेरियसन ल्याउने प्रयास गरेका छन् । सार्वजनिक ट्रेलरमा उनलाई प्रेमीको रूपमा प्रस्तुत गरिएको छ । उनले फिल्मकै लागि कपाल काटेका छन् ।

निर्माता सुनिलकुमार थापाले अनमोलले आफ्नो भूमिकालाई गम्भीरतापूर्वक लिन थालेको भन्दै प्रशंसा गरे । उनले ‘ए मेरो हजुर ४’मा अनमोलले गरेको कामले उनको अभिनयलाई लिएर हुने आलोचकको मुख बन्द गर्ने बताए । फिल्मलाई झरना थापाले निर्देशन गरेकी हुन् ।

अनमोल केसी, सलोन बस्नेत र सुहाना थापासँगै रेअर राई, रवि गिरी, निर्मल शर्मालगायतको अभिनय रहेको फिल्म वैशाख १ गतेबाट प्रदर्शनमा आउँदैछ । संजय लामाको छायांकन, हिमाल केसीको द्वन्द्व, रामजी लामिछाने, कविराज गहतराजको कोरियोग्राफी रहेको फिल्ममा झरना थापा र स्वर्गीय छेतेन गुरुङको कथा, झरना थापा, छेतेन गुरुङ, मन्दीप गौतम, बाबुराम दाहाल, प्रतीक पौडेल, उपकार पाण्डे, माधव शर्माको पटकथा तथा संवाद छ । फिल्मलाई सुनिलकुमार थापाले निर्माण गरेका हुन् ।