काठमाडौँ– सर्वोच्च अदालतले राष्ट्रिय खेलकुद परिषद् (राखेप) का तत्कालीन सदस्य सचिव रमेशकुमार सिलवालको रिट खारेज गरिदिएको छ ।

न्यायाधीशद्वय कुमार रेग्मी र अनिलकुमार सिन्हाको इजलासले बर्खास्तीमा परेका सदस्य सचिव सिलवालको रिट सर्वोच्चले खारेज गरेको हो ।

कार्यसम्पादन गर्न नसकेको भन्दै मन्त्रिपरिषद्को बैठकले सिलवाललाई कात्तिक १ गते सदस्य सचिवबाट बर्खास्त गरेको थियो ।

यो पदमा मङ्सिर १३ गते टङ्कलाल घिसिङलाई नियुक्त गरिएको थियो ।

अदालतको यो फैसलासँगै घिसिङलाई सदस्य सचिवका रूपमा काम गर्न बाटो खुलेको छ ।

सरकारको निर्णयविरुद्ध सिलवाल कात्तिक २८ गते सर्वोच्च अदालतमा रिट दायर गरेका थिए ।

सिलवाललाई ओली नेतृत्वको सरकारले नियुक्त गरेको थियो ।