काठमाडौं – भारतीय राष्ट्रिय क्रिकेट टोलीका पूर्व कप्तान महेन्द्रसिंह धोनीले प्रयोग गर्ने विकेटकिपीङ गोलोव्समा भएको स्टीकर हटाउन आईसीसीले भारतीय क्रिकेट बोर्डलाई पत्राचार गरेको छ ।

आईसीसी विश्वकप क्रिकेट अन्तर्गत दक्षिण अफ्रिकासँगको खेलमा उनले भारतीय सेनाले प्रयोग गर्ने उक्त लोगो प्रयोग गरेपछि सामाजिक सञ्जालमा उनको चर्चा भएको थियो । अन्तर्राष्ट्रिय क्रिकेट परिषद् (आईसीसी) ले धोनीले उक्त लोगो प्रयोग गर्दा नियमविरुद्ध भएको भन्दै बीसीसीआईलाई उक्त लोगो पञ्जाबाट हटाउन लगाउन भन्दै पत्र काटेको छ ।

आईसीसीले पत्रकाटेपछि बोर्डले धोनीलाई उक्त लोगो हटाउन भनिसकेको बताएको छ । धोनीको पञ्जामा रहेको उक्त लोगो आन्दील फेह्लुक्वायोको विकेट लिँदा स्पष्ट देखिएको थियो । ‘आईसीसी सामाग्री तथा पोसाक नियमनले कुनै पनि राजनीतिक, धार्मीक र जातीय विभेद शृङजना गर्ने खालका वस्तु प्रयोग गर्न मनाही छ,’ आईसीसी नियमनमा उल्लेख गरेको छ ।

२०११ मा धोनीलाई लेफ्टीनेन्ट पद सम्मानस्वरुप दिइएको थियो । पछि उनी केही समय पारा रेजिमेन्टको अभ्यासमा पनि सहभागी भएका थिए ।