काठमाडौं– नेपाल आगामी आर्थिक वर्ष भित्रमा विद्युतमा आत्मनिर्भर बन्ने भएको छ । अर्थमन्त्री डा. युवराज खतिवडाले आगामी आर्थिक वर्षभित्रै नेपाल विद्युतमा आत्मनिर्भर हुने बताएका हुन् ।

माथिल्लाे तामाकोशी लगायत ठूला आयोजनाहरुको निर्माण कार्य सम्पन्न हुने चरणमा रहेकाले देश आगामी आर्थिक वर्षभित्रै विद्युतमा आत्मनिर्भर हुने अर्थमन्त्रीको भनाइ छ ।

अर्थमन्त्री खतिवडाले उत्पादन वृद्धि गर्दै मुलुकको बढ्दो व्यापार घाटालाई कम गर्दै लैजाने योजना पनि आगामी आर्थिक वर्षको बजेटमा समावेश गरिएको बताए ।

शुक्रबार काठमाडौंमा आयोजित एक कार्यक्रममा खतिवडाले उत्पादन वृद्धि गर्ने, निर्यात व्यापारलाई बढाउँदै लैजाने विधिबाटै व्यापार घाटालाई कम गर्न सकिने बताए ।

जनताको अपेक्षालाई सम्बोधन गर्न पनि वृद्ध भत्तासहितका सामाजिक सुरक्षा भत्ता बढाउनु परेको खतिवडाको भनाइ थियो ।