काठमाडौँ– सञ्चार तथा सूचना प्रविधिमन्त्री ज्ञानेन्द्रबहादुर कार्कीले रेडियो नेपाललाई जतिसक्दो चाँडो सार्वजनिक प्रशारण सेवामा रूपान्तरण गरिने बताएका छन् ।

रेडियो नेपालको ७२ औँ वार्षिकोत्सवका अवसरमा आइतबार काठमाडौँमा भएको कार्यक्रममा सञ्चारमन्त्री कार्कीले सार्वजनिक प्रशारण सेवामा रूपान्तरणका लागि कानुनी तथा संसदीय प्रक्रिया छिट्टै टुङ्गिने विश्वास व्यक्त गरेका छन् ।

उनले विनाशकारी भूकम्प र कोरोना महामारीलगायत विपदका समयमा रडियो नेपालले निर्वाह गरेको भूमिकाको प्रशंसा पनि गरेका छन् ।

आगामी दिनमा रेडियो नेपालले सार्वजनिक सेवालाई प्रभावकारी रूपमा सञ्चालन गर्नुपर्ने उनको भनाइ छ ।

वार्षिकोत्सवमा रेडियो नेपालले ‘रेडियो नेपाल राष्ट्रिय स्रष्टा सम्मान पुरस्कार’ बाट वरिष्ठ गीतकार किरण खरेल र सङ्गीतकार दीपक जङ्गमलाई सम्मान गरेको छ । त्यसैगरी रेडियो नेपालमा २५ वर्ष सेवा अवधि पूरा गर्ने ३६ कर्मचारीलाई स्वर्ण पदक प्रदान गरिएको थियो ।