राजापुर– बिहीबार राति आएको हावाहुरीका कारण बर्दियामा ३ जना घाइते भएका छन् । हुरीका कारण झण्डै ४ दर्जन घरमा क्षति भएको छ ।

हुरीका कारण घाइते हुनेमा राजापुर नगरपालिका–२ का २० वर्षीया अनु थारू, बासगढी नगरपालिका २७ वर्षीया सुनिता विक र उनका पाँच वर्षीय छोरा नारायण विक छन् ।

घाइतेहरुको कोहलपुर मेडिकल कलेज बाँकेमा उपचार भइरहेको जिल्ला प्रहरी कार्यालय बर्दियाले जनाएको छ ।

करीब एक घण्टा चलेको हुरीले जिल्लाको जनजीवन प्रभावित भएको छ । हावाहुरीको समयमा घरका जस्तापाता लागेर र घरको भित्ता ढलेर घाइते भएका हुन् ।

हावाहुरीेले राजापुर नगरपालिका, बारबर्दिया नगरपालिका, मधुवन नगरपालिका, बासगढी नगरपालिका र गेरुवा गाउँपालिकामा बढी क्षति पु¥याएको छ ।

हावाहुरीबाट भएको क्षतिको विवरण सङ्कलन भइरहेकाले क्षतिको यकिन विवरण आउन बाँकी छ । हाल जिल्लाभर विद्युत् आपूर्ति ठप्प छ । टेलिफोन र इन्टरनेट सेवा अवरुद्ध भएको रहेको प्रमुख जिल्ला अधिकारी रामबहादुर कुरुम्बाङले बताए ।