काठमाडौँ – जात्रा सिरिजमार्फत आफ्नो निर्देशकीय क्षमतालाई प्रस्ट्याई सकेका निर्देशक प्रदीप भट्टराईले नयाँ फिल्म ‘महापुरुष’को तयारीमा जुटेका छन् ।

भट्टराई अहिले स्क्रिप्टको काम सकाएर आउने वैशाख तेस्रो सातादेखि फिल्मको छायाङ्कन गर्ने तयारीमा छन् । ‘हामी वैशाखमा छायाङ्कनमा जाने तयारीमा छौँ । सम्भवतः तेस्रो साताबाट छायाङ्कनमा जान्छौँ’ उनले भने । फिल्मको सम्पूर्ण टिमलाई यसै साता परिचय गराउने उनले बताएका छन्।

टाइटल फाइनल गरिएको फिल्म ‘महापुरुष’बारे उनले धेरै बताउन चाहेनन् । ‘हामी फिल्मको अन्य जानकारी पनि दिनेछौँ, रिलिजका लागि समेत छलफल गर्दछौँ’ निर्देशक भट्टराईले भनेका छन्।

जात्रामार्फत निर्देशनमा डेब्यू गरेका भट्टराईले त्यसपछि निर्देशन गरेका ‘शत्रुगते’ र ‘जात्रै जात्रा’लाई पनि दर्शकले रुचाए । यसैले गर्दा पनि आउँदो फिल्ममा झनै जिम्मेवारी थपिएको उनी बताउँछन्। ‘डेब्यु फिल्ममै पाएको सफलताले म माथि जिम्मेवारी थपिएको महसुस गरेको छु,’ उनले भने, ‘मैले दर्शकमाझ बनाएको विश्वासलाई गुमाउनु छैन बरु बढाउनु पर्ने छ।,’ निर्देशक भट्टराईले भने ।