काठमाडौँ– निर्वाचन आयोगले स्थानीय तहको चुनावको मत गणना स्थलहरूमा सीसीटीभी जडान गर्ने भएको छ ।

बिहीबार आयोजित नियमित पत्रकार सम्मेलनमा आयोगका प्रवक्ता शालिग्राम शर्मा पौडेलले मत गणना स्थलको हकमा सबै ठाउँमा सीसीटीभीको व्यवस्था गराइने जानकारी दिएका हुन् । उनले सीसीटीभीको निगरानी आयोगले गर्ने पनि जनाए ।

सबै निर्वाचन केन्द्रमा भने सीसीटीभी जडान गर्न भने नसकिएको पनि उनले बताए ।

त्यस्तै, उनले स्थानीय तह निर्वाचनमा भाग लिन दर्ता भएका राजनीतिक दलहरूलाई १७ बुँदे निर्देशन जारी गरिएको जानकारी दिए ।

स्थानीय तह निर्वाचन, २०७९ को व्यवस्थापन र सञ्चालनलाई लैंगिक तथा समावेशी बनाएर महिला तथा समावेशी समूहका व्यक्तिहरूलाई निर्वाचन प्रक्रियामा बढीभन्दा बढी सहभागिता र प्रतिनिधित्व गराउन पनि ध्यानाकर्षण गराइएको उनले बताए ।

त्यसैगरी, आयोगका कल सेन्टरमा तीन सयभन्दा बढी जिज्ञासा आएकोसमेत प्रवक्ता पौडेलले जानकारी दिएका थिए ।