जापान– जापानमा महिलाले कार्यस्थलमा हिलजुत्ता लगाउनुपर्ने परम्परालाई लिएर बहस शुरु भएको छ ।

कार्यस्थलमा हिलजुत्ताको प्रयोगलाई निरुत्साहित गर्नुपर्ने भन्दै जापानी सामाजिक अभियन्ताहरुले सामाजिक सञ्जालको ह्यासट्यागमा ‘कुटू’ नामक अभियान शुरु गरेका हुन् । कुटू शब्द जापानी भाषामा कुत्सु अर्थात् जुत्ता तथा पीडा अर्थात् कुत्सुउ नामक शब्दबाट बनेको हो ।

हिलजुत्तालाई निरुत्साहित गर्न अभियन्ताहरुले अनलाइनमा आवेदन समेत शुरु गरेका छन् भने उक्त आवेदनमा २१ हजारभन्दा धेरै अनलाइन हस्ताक्षार संकलन गरिएको अन्तर्राष्ट्रिय सञ्चारमाध्यमले जनाएका छन् ।

५–७ सेन्टिमिटर अग्लो हिलजुत्ता लगाउँदा महिलाको खुट्टाको असर पर्ने भन्दै यस्तो अभियान शुरु गरिएको हो । जापानमा सबै कम्पनी वा रोजगारदाताले महिलालाई हिलजुत्ता लगाउन अनिवार्य नगरे पनि सामाजिक परम्पराअनुसार जापानमा काम गर्ने महिलाले हिलजुत्ता लगाउने गरेका छन् ।

यता जापानको स्वास्थ्यमन्त्रीले भने हिलजुत्तालाई उचित र आवश्यक रहेको जनाएका छन् । जापानका स्वास्थ्यमन्त्रीले संसद्को समितिमा विपक्ष सांसद्हरुको प्रश्नको जवाफ दिँदै जापानी स्वास्थ्यमन्त्री ताकुमी नेमोतोले यस्तो पोसाक उचित र आवश्यक रहेको जनाएका हुन् ।

यद्यपि उनले कुनै रोजगारदाताले महिलालाई हिलजुत्ता लगाउन अनिवार्य गरेमा भने त्यस्तो कदम शक्तिको दुरुपयोग हुने टिप्पणी गरेका छन् ।