काठमाडौं– अभिषेक रिजालको गोलमा नेपाली राष्ट्रिय फुटबल टोली चाइनीज ताइपेइसँग हार बाट जोगिएका छ । ताइपेइमा विहीबार भएको अन्तर्राष्ट्रिय मैत्रीपूर्ण खेलमा नेपालले १–१ गोलको बराबरी खेलेको हो ।

पहिलो हाफमा १–० गोल अन्तरले पछि परेको नेपाली टोली दोस्रो हाफमा लयमा फर्किएको थियो । खेलको ६९ औं मिनेटमा ताइपेइका खेलाडीले नेपालका खेलाडीमाथि फाउल गरेपछि फ्रिकिक पाएको थियो । उक्त फ्रिकिक नेपालका सन्तोष तामाङले प्रहार गरे ।

सन्तोषले प्रहार गरेको फ्रिकिक बल नेपालका युवा युवा खेलाडी अभिषेक रिजालले हेड गर्दै जाली चुमाउन सफल भए । यसअघि ताइपेइले खेलको ३८ औं मिनेटमा नेपालविरुद्ध पहिलो गोल गरेको थियो । ताइपेइका लागि उ चुन चिङले गोल गर्दै घरेलु टोलीलाई अग्रता दिलाएका थिए ।

ताईपेईमा भएको खेलमा नेपाली टोलीले उत्कृष्ट प्रदर्शन गर्दै मैत्रीपूर्ण खेलको विदेश यात्रा सम्पन्न गरेको छ । यसअघि नेपालले मलेसियासँग मैत्रीपूर्ण खेल खेलेको थियो भने उक्त खेलमा नेपाल २–० गोलले पराजित भएको थियो ।

पहिलो खेलमा पराजित भएको नेपाली टोलीमा प्रशिक्षक योहान कालिनले निकै परिवर्तन गरेका थिए । जसमा कप्तान विराज महर्जन समेत बेञ्चमा रहे ।