दोलखा । प्रेस काउन्सिल नेपालका अध्यक्ष बालकृष्ण बस्नेतलाई दोलखाको चरिकोटमा सम्मान गरिएको छ ।

पत्रकारितामार्फत लामो समयदेखि जनअधिकारको पक्षमा काम गरेको भन्दै दोलखाको पुरानो र ठूलो शैक्षिक संस्था गौरीशंकर बहुमुखी क्याम्पसले आफ्नो वार्षिकोत्सवको दिन पारेर युवा पत्रकार बस्नेतलाई सम्मान गरेको हो ।

प्रमुख अतिथि समाजसेवी एवं क्याम्पसका संस्थापक अध्यक्ष आत्मकृष्ण श्रेष्ठले दोसल्ला र सम्मानपत्रसहित बस्नेतलाई सम्मान गरेका हुन् ।

कार्यक्रममा श्रेष्ठले शिक्षा क्षेत्रलाई राजनीतिभन्दा माथि राख्नुपर्ने सुझाव दिए ।

सञ्चालक समिति अध्यक्ष राजेन्द्र मानन्धरले क्याम्पसले आजसम्म गरेको प्रगति र भावी योजना समेतबारे जानकारी गराएका थिए ।

काउन्सिल अध्यक्ष बस्नेतको जन्मस्थान समेत दोलखाको भिमेश्वर नगरपालिका–५ विसुन्टोल हो ।

बस्नेतले २०५२ सालमा छलफल साप्ताहिकबाट पत्रकारिता सुरु गरी २०५७ सालमा कान्तिपुर पब्लिकेशनमा प्रवेश गरेका थिए । करिब २० वर्ष कान्तिपुर दैनिकमा सक्रिय पत्रकारिता गरेका बस्नेत ९ महिनाअघि नेपाली मिडिया नियमनकारी निकायको सर्वोच्च पदमा गरेका हुन् ।

त्यसअवसरमा नेपाल पत्रकार महासंघका केन्द्रीय सदस्य रमेश खतिवडासहितलाई पनि सम्मान गरिएको थियो ।