काठमाडौँ– २०७५ सालमा प्रदर्शनमा आएको फिल्म ‘प्रसाद’ को सफलता पश्चात यसको सिक्वेल बन्ने खबरले चर्चा पाएता पनि छायांकन अझै हुन सकेको छैन ।

दिनेश राउत निर्देशित प्रसादमा विपिन कार्की , नम्रता श्रेष्ठ , निश्चल बस्नेतको मुख्य अभिनय रहेको थियो । फिल्मलाई पत्रकार सुशील पौडेलले लेखेका थिए । फिल्मले समीक्षकबाट त राम्रो प्रतिक्रिया पायो नै दर्शकले पनि रुचाए । फलत: फिल्म बक्स अफिसमा पनि सफल रह्यो । ‘प्रसाद २’ मा पनि सुशीलकै लेखन रहेको छ तर निर्देशक फेरिएका छन् ।

आफूले सिक्वेल फिल्म निर्देशन नगर्ने बताएपछि प्रसादको सिक्वेललाई दिनेशले नभई सौरभ चौधरीले निर्देशन गर्दै छन् । ‘लभ डायरिज’ मार्फत निर्देशनमा डेब्यु गरेका सौरभको लागि यो फिल्म आफूलाई प्रमाणित गर्ने अवसर बन्नेमा दुई मत छैन ।

तर, फिल्मको छायांकन हुन सकेको छैन । केही समय यता छायांकनमा जान अल्मलिएको फिल्म यही महिनाको अन्तिममा वा आउँदो महिना वैशाखमा छायांकनमा जाने तयारी गर्दैछ । नम्रताले यही साता विनय श्रेष्ठसँग अभिनय गर्ने फिल्मको मुहूर्त गर्दै छिन् ।

यसैले गर्दा पनि त्यसअघि नै फिल्मको छायांकन गर्ने गरी निर्माता सुभाष थापाले तयारी थालेका छन् । यसका लागि उनले लेखक पौडेलसँगै निर्देशक सौरभ र कलाकारहरू विपिन, नम्रता तथा निश्चलसँग छलफल गरिरहेका छन् । सोसल ड्रामा फिल्मलाई बाग्लुङसहित आसपासमा छायांकन गरिने बुझिएको छ ।