काठमाडौं– अल्पसङ्ख्यक माथिको दमनका क्रममा चीनले गत डिसेम्बर यता तीनवटा बौद्ध मूर्ति ध्वस्त पारेको खुलासा भएको छ ।

समाचारमा जनाइएअनुसार तिब्बतमा रहेका विभिन्न तीन मूर्तिलाई चीन सरकारले ध्वस्त पारिदिएको हो । यसमध्ये एक मूर्ति ६ वर्ष अघि निर्माण गरिएको तिब्बती बौद्ध गुरु पद्मसम्भवको रहेको तिब्बत प्रेसले जनाएको छ ।

यसबाहेक चीनले जनवरी महिनाको सुरुवातमा ड्रागो भन्ने स्थानको गुम्बामा रहेको अग्लो मूर्ति पनि ध्वस्त पारेको रेडियो फ्री एसियाले जनाएको छ । त्यसको केही सातापछि त्यस ठाउँबाट ९ सय मिटर टाढा रहेको अर्को ९९ फिट अग्लो मूर्ति पनि ध्वस्त पारेको जनाइएको छ ।

तिब्बत प्रेसले जनाएअनुसार चीनले सांस्कृतिक क्रान्तिलाई पुनर्ताजगी गर्न यस्ता किसिमका गतिविधिलाई निरन्तरता दिँदै आएको छ । चीनको सत्तारुढ कम्युनिष्ट पार्टीको तिब्बती बौद्ध धर्मलाई ‘चिनियाँकरण’ गर्ने नीतिअनुसार यस्ता गतिविधि सञ्चालित रहेको तिब्बत प्रेसको भनाइ छ ।