भारत– कमेडीमा छुट्टै पहिचान स्थापित गरेका कपिल शर्माले आफ्नो शो ’द कपिल शर्मा शो’ केही समयका लागि रोक्ने भएका छन् ।

एक महिना लामो अमेरिका–क्यानाडाको टुरमा जाने भएपछि उनको शो प्रसारण नहुने भएको हो । चर्चित कमेडी रियालिटी शो ’द कपिल शर्मा शो’ का केही ब्याकअप एपिसोड छायांकन गर्ने लक्ष्य राखिएता पनि त्यो पूरा नहुने देखिएपछि एक महिनासम्म शो प्रसारण नहुने सम्भावना बढेको हो ।

तर, शो प्रसारण हुने च्यानल सोनीले पुरानै शो पनि प्रसारण गर्न सकिने संकेत गरेको छ । यद्यपि, च्यानलले यसबारेमा आधिकारिक रूपमा केही बोलेको छैन । यसअघि पनि कपिलले बेलाबेलामा शो स्थगित गरिरहेका थिए ।

उनले लकडाउनमा गेस्टको कमि भएपछि र आफू पिता बनेपछि शो स्थगित गरेका थिए । त्यस अगाडि पनि आफ्नो टीमका सुनिल ग्रोवरसँग झगडा परेपछि उनले शो रोकेका थिए ।

यद्यपि यसपटक शो रोकिन्छ वा पुरानै शो टेलिभिजनले देखाउँछ यो भने केही दिनमा थाहा हुने नै छ । कमेडियन शर्मा जुनको मध्यतिर अमेरिका–क्यानडा टुरका लागि जाने तयारीमा छन् । त्यहाँ उनी एक महिना बस्ने छन् ।