काठमाडौँ– नेपाली काँग्रेसका प्रवक्ता डा. प्रकाशशरण महतले गठबन्धन बिना नै काँग्रेसले चुनाव जित्ने ठाउँमा गठबन्धन नहुने केन्द्रीय सदस्यहरूको मत रहेको बताएका छन् ।

आज बसेको केन्द्रीय समिति बैठकबारे पत्रकारहरूलाई जानकारी दिदैँ प्रवक्ता महतले गठबन्धन गर्दा पार्टीले जित्ने ठाउँमा मात्र गठबन्धन गर्नुपर्ने र काँग्रेसले चुनाव जित्ने ठाउँमा गठबन्धन गर्न नहुने केन्द्रीय सदस्यहरूको धारणा रहेको बताए ।

प्रवक्ता महतले सभापति शेरबहादुर देउवाले जबर्जस्ती निर्णय नलाद्ने र गठबन्धन गर्ने/नगर्ने बारेको निणर्य केन्द्रीय कमिटी बैठकले गर्ने बताए ।

उनले स्थानीय तहको आवश्यकतालाई वेवास्ता गरेर केन्द्रबाट कुनै निर्णय नलाद्ने बताए । उनले सभापतिले गठबन्धन लाद्न खोजेको भन्दै गलत प्रचार भइरहेको पनि बताए । बैठकमा केन्द्रीय सदस्यहरूले सम्बन्धित जिल्लाको तल्लो तहको संगठनको अवस्थाको बारेमा रिर्पोटिङ गरिरहेको बताएका थिए ।