काठमाडौँ– सिनेम्याटोग्राफर संजय लामाले कलाकारले साथ दिँदा फिल्मको छायांकन तय भएको सेड्युल अगाडि नै सकिएको बताएका छन् ।

’हामीले ३५ दिनको सेड्युल लिएर छायांकनमा गएका हौँ ।

तर, कलाकारहरू हामीभन्दा अगाडि तयार भएर सेटमा आउने हुँदा छायांकन १८ दिनमै सकियो’ संजयले बताए । उनले आफ्नो टिम तयार हुने समयमा कलाकार पनि तयार भइसक्ने बताए ।

’विहानको ५ बजे हामी तयार हुने समयमा कलाकारहरू तयार भइसक्नु हुन्थ्यो । त्यहिँ भएर फिल्मको छायांकन अगाडी नै सकियो’ संजयले बताए । उनले फिल्म मन्त्रको ट्रेलर सार्वजनिक कार्यक्रममा सौगात मल्ल, बुद्धि तामाङ र दीया पुनको तारिफ गर्दै यस्तो बताएका हुन् ।

फिल्ममा ५१ सय मिटरको उचाइबाट देखिने हिमाली सुन्दरतालाई दर्शकले देख्न पाउनेछन् । गोर्खा जिल्लाको चुमनुब्री सामागाउँ,बिरेन्द्र ताल र पुङ्गिन गुम्बालगायतका रमणीय दृश्य संजयले कैद गरेका छन् ।

उनले छायांकनको समयमा विहान र बेलुकी गाह्रो भएको सम्झीए । उनले भने , ’तापक्रम माइनसमा हुने हुँदा विहान र बेलुकीको समय गाह्रो हुन्थ्यो । यद्यपि अहिले पर्दामा हेर्दा त्यो सुखमा परिणत भएको छ ।’ फिल्म छायांकनको क्रममा सम्पूर्ण टिमबाट आफूले सहयोग पाएको उनले बताए ।

अभिनेता सौगात मल्लले आफूलाई हिमाल मन पर्ने बताएका छन् । तराईमा जन्मिएको भएता पनि पहिलोपटक फिल्म ’कागबेनी’ छायांकनको लागि हिमाल पुगेका सौगातले त्यसयता आफूलाई हिमालले तानेको बताए । हिमाली प्रेम कथामा आधारित भनिएको फिल्म ’मन्त्र’ मा उनले मनास्लुको काँखमा रागेको गाउँमा झन्डै २५ दिन बिताएका थिए ।

सौगात झैँ फिल्मका अर्का पात्र बुद्धि तामाङले पनि हिमाली सुन्दरताले आँखालाई शीतलता दिने बताए ।

गोर्खा सिरानचोक एण्ड लिगलिग कोट फिल्मस् प्रा.लि.को ब्यानरमा निर्मित फिल्मलाई खिलबहादुर गुरुङले निर्देशन गरेका हुन् । डिभाइन इन्टरटेन्टमेन्ट र डि.एस प्रोडक्सनको सहकार्य रहेको फिल्म २०७९ साल बैशाख १६ गते बाट प्रदर्शनमा आउनेछ । यसमा नमिता घिसिङ्ग, विरबहादुर लामा, पासाङ्ग टि शेर्पाको पनि अभिनय रहेको छ । देवेन्द्र मानन्धर कार्यकारी निर्माता रहेको ‘मन्त्र’मा रविराज कार्की, सुरेश कार्की र सुभ श्रेष्ठको लगानी रहेको छ ।

साम्तेन भुटिया, सुनिल नेउरे, परिच्छेद सेनले लेखेको फिल्ममा सन्तोष सुनारको संगीत, संजय लामाको छायांकन, मित्र डि गुरुङको सम्पादन,सुजिल कर्माचार्यको पाश्र्व संगीत रहेको छ ।