काठमाडौँ- बार्नर ब्रोजले सन् २०२१ मा रिलिज हुने तयारीमा रहेका सबै फिल्म ओटीटीमा पनि सार्वजनिक गर्ने निर्णय थियो । हलिउडको ठूलो फिल्म निर्माण कम्पनीमध्ये एक मानिने बार्नरले फिल्म हलसँगै ओटीटीमा पनि एकै दिन सिनेमा रिलिज गर्ने घोषणा गर्दै एक महिनाका लागि एचबिओ म्याक्समा पनि स्ट्रिमिङ हुने जनायो ।

सन् २०२१ कै अक्टोबरमा रिलिज भएको फिल्म ‘ड्यून’ एचबिओ म्याक्स पश्चात अमेजन प्राइममा रिलिज हुने भएको छ । निर्माण टिमले मार्च २५ मा फिल्मलाई ओटीटीमा रिलिज गर्न लागेको हो ।

डेनिस भेल्लिन्युभले निर्देशन गरेको साइन्स फिक्सन फिल्म ‘ड्युन’ मा टिमोथी चालमेट, जेन्दया, रेबाका फर्गुसन, अस्कर आइज्याक, जोश ब्रोलिन, जेसन मामोओ लगायतका कलाकारले अभिनय गरेका छन् ।

समीक्षकबाट राम्रो प्रतिक्रिया पाएको फिल्म ‘ड्युन’ ले अमेरिकामा व्यापार पनि राम्रो गरेको थियो । फिल्मलाई ओटीटी प्लेटफर्ममा पनि रुचाउने विश्वास प्राइम अमेजनको छ ।