काठमाडौं – प्रधानमन्त्री कप एकदिवसीय क्रिकेट प्रतियोगिताको फाइनलमा विभागीय टोली त्रिभुवन आर्मी क्लब र नेपाल पुलिस क्लब भिड्ने भएका छन् । बिहीबार भएको दोस्रो सेमीफाइनल खेलमा विभागीय टोली शसस्त्र प्रहरी बलको एपीएफविरुद्ध नेपाल पुलिस क्लबले ५ विकेटको जीत हात पार्दै फाइनल प्रवेश गरेको हो ।

एपीएफ क्लबले दिएको ४२ रनको झिनो लक्ष्य पछ्याएको पुलिसले ९.४ ओभरमा ५ विकेट गुमाएर लक्ष्य पूरा गर्‍यो । पुलिसका लागि पवन शराफले २१ रन बनाए भने दीपेन्द्रसिंह ऐरीले १३ रन बनाएका थिए । यस्तै पुलिसविरुद्ध एपीएफका कप्तान बसन्त रेग्मीले ३ विकेट लिए भने शरद भेषावकरले २ विकेट लिए ।

कीर्तिपुरस्थित त्रिभुवन विश्वविद्यालय क्रिकेट मैदानमा भएको खेलमा यसअघि टस हारेर पहिलो ब्याटिङ गरेको एपीएफका कुनै पनि ब्याट्सम्यानले दोहोरो अंक जोड्न सकेनन् ।

२२.१ ओभर खेलेको एपीएफले सबै विकेट गुमाएर ४१ रन मात्रै बनायो । एपीएफविरुद्ध राष्ट्रिय क्रिकेट टोली तथा पुलिस क्लबका बलर ललित नारायण राजवंशीले ४ विकेट लिए भने कुसल भसुर्तेल र सागर ढकालले समान ३–३ विकेट लिए ।