काठमाडौं – दक्षिण अफ्रिका विरुद्धको एक दिवसीय क्रिकेट शृङ्खलाको उपाधि बंगलादेशले उचालेको छ। बुधबार राति भएको अन्तिम खेलमा बंगलादेशले अफ्रिकामाथि ९ विकेटको जित निकाल्दै उपाधि हात पारेको हो। यो बंगलादेशको ऐतिहासिक सफलता हो।

१५५ रनको मध्यम लक्ष्य बंगलादेशले सजिलै भेट्टाएको हो। एक विकेटको क्षतिमा २६ दशमलव ३ ओभरमा बंगलादेशले लक्ष्य पूरा गरेको थियो। बंगलादेशका लागि कप्तान तामिम इकबालले अविजित ८७ रनको अर्धशतकीय इनिंग्स खेले। लिट्टोन दासले ४८ रन बनाउँदा शाकिब अल हसन १८ रनमा नटआउट रहे।

पहिलो ब्याटिङ गरेको अफ्रिका ३७ ओभरमा १५४ रनमा अलआउट भएको थियो। अफ्रिकाका लागि जानेमन मालनले ३९, केशव महाराजले २८ र ड्वाने प्रेटोरियसले २० रन जोडे। अन्य ब्याट्सम्यानले दोहोरो अंक जोड्न सकेनन्।