काठमाडौँ– गृहमन्त्री बालकृष्ण खाँणले कर्तव्य पालनाका सिलसिलामा मृत्युवरण गरेकी प्रहरी जवान उर्मिला श्रेष्ठको परिवारलाई राज्यले सहयोग गर्ने बताएका छन् ।

उर्मिलाका श्रीमान् नविन श्रेष्ठसँगको टेलिफोन संवादमा मन्त्री खाँणले यस्तो प्रतिबद्धता जनाएका हुन् ।

कर्तव्य पालनाका क्रममा उनको मृत्यु भएको भन्दै उनले काजकिरियाका कार्य पूरा भइसकेपछि सम्पर्कमा आउन उर्मिलाका श्रीमान् नविनसँग आग्रह गरेका छन् ।
मन्त्री खाँणले मृतक उर्मिलाप्रति श्रद्धाञ्जली पनि व्यक्त गरेका छन् ।

प्रहरी जवान उर्मिलाको आइतबार मोरङको लेटाङ नगरपालिका–५ मा प्रदर्शनकारीले गरेको आक्रमणमा परी मृत्यु भएको थियो ।

स्थानीय शिक्षा विकास माद्यमिक विद्यालयकी १४ वर्षीया छात्रालाई शिक्षक मनोज पौडेलले यौन दुर्व्यवहार गरेको आरोप लगाउँदै विद्यार्थी तथा अभिभावकले विद्यालयमा तोडफोड र आगजनी गरेका थिए ।

तनाव साम्य पार्न खटिएकी प्रहरी उर्मिलाको प्रदर्शनकारीको आक्रमणमा परी मृत्यु भएको थियो ।