काठमाडौं– चिनियाँ विदेशमन्त्री वाङ यीले यही महिनाको अन्त्यतिर भारतको भ्रमण गर्ने भएका छन् । भारतबाट प्रकाशित हुने इकोनोमिक टाइम्सले यही महिनाको अन्त्यतिर चिनियाँ विदेशमन्त्रीले भारतको भ्रमण गर्न लागेको जनाएको हो ।

कोरोना भाइरसको महामारी र सुदूर उत्तरी गलवान क्षेत्रमा दुई मुलुकका सेनाबीच भएको झडप यता चिनियाँ विदेशमन्त्रीले भारतको भ्रमण गर्न लागेको यो पहिलो अवसर हुनेछ ।

लद्दाखको सीमा क्षेत्रमा दुई देशका सैनिकबीच तनाव साम्य नभइसकेका बेला चिनियाँ विदेशमन्त्रीको भारत भ्रमणलाई निकै महत्वका साथ हेरिएको छ । यसबाहेक दुबै मुलुकसँग राम्रो सम्बन्ध रहेको रुसले युक्रेनमाथि जारी राखेको आक्रमणका बेला चिनियाँ विदेशमन्त्रीले भारतको भ्रमण गर्नुलाई भू राजनीतिक रुपमा पनि निकै चासोका साथ हेरिएको भारतबाट प्रकाशित हुने इकोनोमिक टाइम्सले जनाएको छ ।

चीनले रुस, भारत, चीनबीचको त्रिपक्षीय समूह रिक र उदाउँदा अर्थतन्त्र भएका मुलुकहरू ब्रिक्सको अध्यक्षता गरिरहेको छ । सन् २०२० यता भारतीय विदेशमन्त्री एस जयशंकर र वाङ यी बीच विभिन्न अवसरमा भेटवार्ता भएपनि दुई मुलुकको सम्बन्धले गति लिन सकेको छैन ।

गलवान क्षेत्रमा जारी तनावका विषयमा भारतले चासो दिएपनि यसबारे चिनियाँ पक्षबाट यसको ठोस सम्बोधन हुन नसकेको भारतले गुनासो गर्दै आएको छ ।