काठमाडौँ– निर्वाचन आयोगले राष्ट्रिय प्रजातन्त्र पार्टी नेपाललाई ‘तीर’ चिह्न प्रदान गरेको छ ।

राप्रपा नेपालले आज विज्ञप्ति जारी पार्टीलाई निर्वाचन आयोगले स्थानीय तहको चुनाव प्रयोजनका लागि ‘तीर’ चिह्न प्रदान गरेको जानकारी दिएको हो ।

पार्टीको पुरानै निर्वाचन चिह्न ‘गाई’ नदिएकोप्रति राप्रपा नेपालले असन्तुष्टि जनाएको छ ।

विज्ञप्तिमा भनिएको छ– ‘आफ्नो पार्टीको पुरानै निर्वाचन चिह्न ‘गाई’ प्राप्त गर्नका लागि हाम्रो पार्टीले निर्वाचन आयोगको निर्णयविरुद्ध कानुनी प्रक्रियामा जाने विकल्पलाई खुला राख्दै पार्टीले स्थानीय तहको निर्वाचन नजिकिएको बाध्यात्मक परिस्थितिलाई ध्यानमा राखेर हाललाई ‘तीर’ निर्वाचन चिन्हलाई स्वीकारेको छ ।’

राप्रपा नेपालले देशभरिका सङ्गठनलाई अर्को व्यवस्था नहुन्जेलसम्म ‘तीर’ चुनाव चिह्नलाई पार्टीका प्रचार प्रसार सामग्रीहरूमा प्रयोग गर्न तथा पार्टीको झन्डामा रहेको पहेँलो रङ्गको पृष्ठभूमिको मध्यभागमा रहने गरी कालो रङ्गमा ‘तीर’ चिन्ह प्रयोग गर्न प्रवक्ता सुरेश आचार्यले विज्ञप्तिमार्फत् नेता तथा कार्यकर्तालाई जानकारी दिएका छन् ।