काठमाडौँ– युनिलिभर नेपालले लिमिटेड (यूएनएल) ११२ औंँ अन्तर्राष्ट्रिय महिला दिवस मनाएको छ ।

महिलाहरूका अमूल्य उपलब्धि तथा हालसम्म आर्थिक तथा राजनीतिक रूपमा महिलाको योगदान स्मरण गर्दै युनिलिभर नेपालको कर्पोरेट कार्यालयमा यो दिवस मनाइएको हो ।

‘ब्रेक द बायस’ मुख्य विषयवस्तुमा आधारित यो कार्यक्रममा लैङ्गिक पूर्वाग्रह, रुढीवादी धारणा र विभेदमुक्त विविध, समतामुलक र समावेशी कार्यस्थल निर्माण गर्ने विषयमा प्रतिबद्ध जनाइएको थियो ।

आ–आफ्नो क्षेत्रमा अग्रणी मार्गदर्शक रहेका तीन महिलाहरू वर्षा श्रेष्ठ– बिजनेस हेड, इक्रा नेपाल तथा नेपाली बैंकिङ्ग क्षेत्रकै पहिलो महिला महाप्रबन्धक, उपासन पौडेल–सीईओ, युनाइटेड इन्स्योरेन्स कम्पनी लिमिटेड र भावना घिमिरे–निर्देशक, ब्याट एन्ड बल फाउन्डेसन तथा क्रिकेट एसोसिएसन अफ नेपालका पूर्व तथा प्रथम सीईओ उपस्थित थिए ।

कार्यक्रममा युनिलिभर नेपाल लिमिटेडका प्रबन्ध निर्देशक अम्लान मुखर्जीले दैनिक जीवनमा महिलाको केन्द्रीयता र नेतृत्वको महत्वलाई सम्मान गर्ने सन्देश दिएका थिए ।

त्यस्तै, मुम्बईबाट भर्चुअल रूपमा उपस्थित हिन्दुस्तान लिभर लिमिटेडका मानव संशाधन महाप्रबन्धक माथनराजले लैङ्गिक सन्तुलित कार्यबल सृर्जना गर्न कम्पनीको प्राथमिकताबारे चर्चा गरेका थिए ।

कार्यक्रमको अन्तिम खण्डमा जुम्बा सत्र, फ्ल्यास मोब, उपहार वितरणलगायतका विभिन्न मनोरञ्जनात्मक क्रियाकलापमा सहभागीहरूको उत्साहजनक सहभागिता रहेको थियो ।