काठमाडौँ– पाकिस्तानमा भएको पाँचौ अन्तर्राष्ट्रिय पाकिस्तान आर्मी टिम स्प्रिट (पीएटीएस) प्रतियोगिता २०२२ मा स्वर्ण पदक जितेका नेपाली सैनिकहरूलाई सम्मान गरिएको छ ।

आज जंगी अड्डामा भएको कार्यक्रममा प्रधानसेनापति प्रभुराम शर्माले स्वर्ण पटक जित्न सफल सैनिकहरूलाई ‘प्रधान सेनापति प्रशंसा निशान’ तथा प्रशंसा–पत्र प्रदान गरेका हुन् ।

प्रतियोगितामा नेपाली सैनिकहरूले हतियार तथा इक्युप्मेन्टसहित न्यूनतम ३५ किलो वजन बोकेर उच्चस्तरको साहसिक सहिष्णुता, अब्बल सैनिक कला तथा निर्णायक क्षमताको प्रदर्शन गरेका थिए ।

पाकिस्तानको मरुभूमि तथा जंगल इलाका मिश्रित कठिन भूगोल भएको करिब ९ सय वर्ग किलोमिटर क्षेत्रफलमा फैलिएको इलाकामा यो प्रतियोगिता तीन दिन र तीन रातसम्म सञ्चालन भएको थियो ।

१६ राष्ट्रको सहभागिता रहेको प्रतियोगिता फागुन २३ देखि २५ गतेसम्म सञ्चालन भएको थियो ।

नेपाली सेनाले यस प्रतियोगितामा पहिलोपटक सहभागिता जनाएको हो ।