काठमाडौं– भारतीय राजदूतावासको सहयोगमा युक्रेनबाट उद्धार गरिएकी एक पाकिस्तानी युवतीले भारतीय प्रधानमन्त्री नरेन्द्र मोदीलाई धन्यवाद दिएकी छिन् ।

भिडियो सन्देशमार्फत भारतीय दूतावासको सहयोगमा युक्रेनबाट उद्धार गरिएकी पाकिस्तानी युवती आस्मा शफिकले मोदीलाई धन्यवाद दिएकी हुन् । ‘निकै गाह्रो अवस्थामा सहयोग गरेकोमा किभमा रहेको भारतीय राजदूतावासप्रति म कृतज्ञ छु ।’ भिडियोमा उनले भनेकी छिन्, ‘म प्रधानमन्त्री नरेन्द्र मोदी प्रति पनि कृतज्ञ छु । आशा गरौँ हामी सुरक्षित घर फिर्नेछौं ।’ भारतीय समाचार संस्था एएनआईले जारी गरेको उनको भिडियो सन्देशमा भनिएको छ ।

हाल उनी पश्चिम युक्रेनतर्फ लागेको र त्यहाँबाट उनी घर फिर्ने स्रोतहरूलाई उद्धृत गर्दै एएनआईले जनाएको छ ।

गएको फेब्रुअरी २४ मा रुसले युक्रेनमाथि आक्रमण गरेपछि त्यहाँबाट भारतीय दूतावासले आफ्ना नागरिकको उद्धार कार्यलाई तीब्र बनाइरहेको छ । उद्धारका क्रममा भारतले अपरेशन गङ्गाको नामबाट १६ हजार भन्दा धेरै नागरिकलाई स्वदेश फिर्ता गरिसकेको छ ।