जनकपुरधाम– नागरिकताविहीन रहेकाहरूले सोमबार धनुषाको ढल्केवरमा प्रदर्शन गरेका छन् ।

जन्मसिद्ध नागरिकका सन्तानले नागरिकता पाउनुपर्ने माग गर्दै प्रदर्शन भएको हो ।

लामो समयदेखि संसदमा रहेको नागरिकता विधेयक तत्काल पारित हुनुपर्ने माग गर्दै उनीहरूले सोमबार पूर्व–पश्चिम राजमार्ग अवरुद्ध गरी प्रदर्शन गरेका छन् ।

‘संविधानको धारा लागू गर, नागरिकता विधेयक पारित गर, गैर नागरिक बनाउन पाइँदैन, पहिचान खोस्न पाइँदैन, जन्मसिद्ध नागरिकका सन्तालाई वंशजका आधारमा नागरिकता दे’ लगायतका नारा लेखिएको ब्यानर तथा प्लेकार्ड बोकेर प्रदर्शनकारीहरूले नाराबाजी गर्दै राजमार्ग अवरुद्ध गरेका थिए ।

प्रदर्शनका क्रममा इलाका प्रहरी कार्यालय ढल्केवरबाट खटिएको प्रहरी टोलीले नागरिकताविहीन सङ्घर्ष समितिका केन्द्रीय संयोजक जित साफी, रविन्द्र कुशवाहा र अशोक साहलाई पक्राउ समेत गरेको थियो ।

प्रदर्शनको नाममा चक्काजाम गरेपछि उनीहरूलाई पक्राउ गरी दुई घण्टापछि रिहा गरिएको इलाका प्रहरी कार्यालय ढल्केवरका प्रहरी निरीक्षक प्रदिप सुवेदीले बताए ।
संघर्ष समितिले जन्मसिद्ध नागरिकका सन्तालाई वंशजको आधारमा नागरिकता दिनु पर्ने र आमाको नामबाट समेत नागरिकता दिनुपर्ने मागसहित दबाबमुलक सातदिने आन्दोलनको कार्यक्रम तय गरेको छ ।