काठमाडौं– राष्ट्रिय जनता पार्टी (राजपा) नेपालको अध्यक्ष मण्डलका सदस्य तथा सांसद राजेन्द्र महताले सरकारले आगामी आर्थिक वर्षका लागि ल्याएको बजेट संघीयतालाई असफल बताउने खालेको रहेको आरोप लगाएका छन् ।

सरकारले संघीयतालाई असफल बनाउने गरी आगामी आर्थिक वर्षको बजेट ल्याएको महतोको भनाइ छ ।

मंगलबारको प्रतिनिधिसभा बैठकमा आगामी आर्थिक वर्षको बजेटमाथिको छलफलमा भाग लिँदै महतोले सरकारले ल्याएको बजेट विभेदकारी भएको पनि बताए ।

५० प्रतिशतभन्दा बढी जनसंख्या भएको मधेशलाई सरकारले २० प्रतिशतभन्दा कम बजेट विनियोजन गरेर सरकारले विभेद गरेको महताको तर्क छ ।

महतोले ६ करोड बजेट विनियोजन गरेर सरकारले सांसदहरुको बदनाम गराएको पनि आरोप लगाए ।

विदेश नीति, राष्ट्रिय सुरक्षा, मौद्रिक नीति र राष्ट्रिय गौरवका आयोजनाबाहेकका सबै अधिकार प्रदेश र स्थानीय सरकारलाई दिन आफ्नो पार्टीले सरकारसँग पटक–पटक माग गरे पनि सो अनुसार काम हुन नसकेको महतोको भनाइ थियो ।