काठमाडौँ- एमसीसीले तरंगित नेपाली राजनीतिक किचलो उत्कर्षमा पुगेका बेला बिहीबार राति बालकोटबाट एउटा तस्वीर आयो । जहाँ प्रधानमन्त्री शेरबहादुर देउवा र देउवा पत्नी ‘फस्र्ट लेडी’ आरजु राणा र एमाले अध्यक्ष केपी शर्मा ओली छन् ।

फोटोमा देउवा र आरजुको बीच पर सोफामा आरामदायी रुपमा बसिरहेका ओली देखिन्छन् । उनी हाइसञ्चो छन् । संसद् अवरुद्ध गरेर सरकारलाई अफ्ठेरो पारेका छन् भने सत्ता गठबन्धनमा प्रचण्ड फ्याक्टरले देउवालाई आफ्नै ‘कोर्ट’मा आउनैपर्ने बाध्यतामा पारेका छन् ।

एमसीसी पारित गर्न कांग्रेसले चाहेको छ । एमाले साथ दिन पनि तयार देखिएको छ । माओवादी अध्यक्ष प्रचण्डले धोकाधडीको राजनीति गर्दा ओली र देउवालाई मिलाउन आरजुको सक्रियता बढेको बुझ्न गाह्रो छैन ।

खासगरी देउवाको ‘किचेन क्याबिनेट’ सम्हाल्दै आएकी आरजु यसपटक त्यसबाट बाहिर निस्केर एमसीसी पारित गर्ने दौडमा होमिएकी छन् । उसो त देउवाको मन्त्रिपरिषद्मा सरकारका गृहमन्त्रीभन्दा देउवा गृहमन्त्रालय बढी हाबी हुने गरेको चर्चा पनि यसअघिदेखि चल्दै आएको छ ।

सरकारका नियुक्तीदेखि महत्वपूणर् निणर्यमा आरजु निर्णायक हुने गरेको टिप्पणी पनि देउवाकै किचेन क्याबिनेटका व्यक्तिहरु बताउँछन् । यसपटक एमसीसीलाई लिएर देउवाको दौडधुप केवल चर्चामा सीमित छैन, सत्ता गठबन्धन कायम राख्ने वा गठबन्धन तोडेर भएपनि एमसीसी पारित गर्ने निर्णायक मोडमा छ ।

यो एक किसिमले देउवाको जटिल मोड हो । खासगरी सत्तामै बसेर देउवासँग प्रतिपक्षीको जस्तो दोहोरो भूमिका खेलिहरेका प्रचण्डसँग आरजु पनि रुष्ट देखिन्छिन् । बाहिर आफु हाबी भएको देखाउने तर भित्रभित्र समस्या पर्ने प्रचण्ड प्रवृत्तिविरुद्ध आरजु निर्णायक तबरमा छलफलमा उत्रिएको देखिन्छ ।

यदि आरजुको यही सक्रियता बढ्यो, प्रचण्ड र माधव नेपालको पुरानै दोहोरो चरित्र प्रस्तुत भइरहेर ओली एमसीसी पारित गर्न सहमत भए सत्ता गठबन्धनमा उथलपुथल ल्याउन ‘आरजु फ्याक्टर’ काफी हुने देखिन्छ ।