काठमाडौं- भारतको नयाँ दिल्लीबाट काठमाडौं आएको एयर इन्डियाको जहाजले आइतबार बिहान त्रिभुवन अन्तर्राष्ट्रिय विमानस्थलमा ओभरसुट गरेको छ । अवतरणका क्रममा जहाजले धावनमार्गमा नछोइ फेरि उडान गर्नुलाई ओभरसुट भनिन्छ ।

अवतरण गर्नै लाग्दा मिस अप्रोच (सही बाटो पहिल्याउन नसक्नु) भएपछि उक्त जहाजले ओभरसुट गरेको विमानस्थल कार्यालयले जनाएको छ । एयर बस ३२०–२१४ सिरिजको जहाजकै समस्याले मिस अप्रोच भएर ओभरसुट गरिएको विमानस्थल महाप्रबन्धक राजकुमार क्षेत्रीले जानकारी दिए ।

बिहान ८ बजेर ५५ मिनेटको समयमा अवतरण गर्न लागेको जहाजले सही बाटो पहिल्याउन नसकेपछि ओभरसुट गरेको थियो । ओभरसुट गरेको जहाज निजगढ पुगेर आएपछि सवा नौ बजे विमानस्थलमा सफलताका साथ अवतरण भएको थियो ।

ओभरसुट गर्नुलाई सामान्य रुपमा लिने गरिएपनि आइतबारको ओभरसुट भने असामान्य देखिएको र ठूलो दुर्घटना हुनबाट बचेको विमानस्थल अधिकारीको भनाइ छ । उक्त जहाज अवतरणपछि यात्रु लिएर पुनः दिल्ली फर्किसकेको छ ।