काठमाडौं– पशुपतिनाथ मन्दिरको पावन परिसरमा कृपालु उद्यान लेखिएको बोर्डलाई हटाएर त्यसलाई वन काली उद्यान लेखिएको बोर्डले प्रतिस्थापन गरिएको छ ।

पुरातत्व विभागको आदेश बमोजिम पशुपति क्षेत्र विकास कोषले उक्त बोर्ड उच्च सुरक्षाका बिच प्रतिस्थापन गरेको थियो । उक्त बोर्ड पशुपति क्षेत्र विकास कोषका सदस्य सचिव डाक्टर मिलन थापाको उपस्थितिमा गरिएको थियो ।

पुरातत्व विभागको मिति २०७७ पुस २८ गते र मिति २०७७ माघ ४ गते को पत्रानुसार पशुपति संरक्षित स्मारक क्षेत्र भित्र वन काली क्षेत्रमा राखिएको पशुपति क्षेत्रको धार्मिक, सांस्कृतिक एवम् आध्यात्मिक महत्वमा आँच पुग्ने गरी राखिएको बोर्ड तुरुन्तै हटाई विभागलाई जानकारी गराउन भन्ने व्यहोराको पत्र प्राप्त भएको हो ।

उक्त पत्रअनुरूप कोषको नीतिगत निर्णय बमोजिम उल्लेखित स्थानमा रहेको कृपालु उद्यानको नाम रहेको बोर्ड हटाएर वन काली उद्यान, पशुपति लेखिएको बोर्ड राखिएको पशुपति क्षेत्र विकास कोषका सदस्य सचिव डाक्टर थापाले बताए ।