काठमाडौं- काठमाडौंमा जारी प्रधानमन्त्री कप एक दिवसीय राष्ट्रिय क्रिकेट प्रतियोगिता अन्तर्गत आज (शुक्रबार) २ खेल हुदैछन् । प्रतियोगिता अन्तर्गत प्रदेश १ र कर्णाली प्रदेशबीचको खेल कीर्तिपुर मैदानमा हुनेछ । त्यस्तै आजै हुने सशस्त्र प्रहरीको टीम एपीएफ र गण्डकी प्रदेशबीच खेल मुलपानी क्रिकेट मैदानमा हुने छ ।

समुह बीको खेलमा कर्णाली प्रदेश प्रतियोगिताबाट बाहिरिसकेको छ । अघिल्लो चरणको प्रवेशको गणितिय सम्भावना बोकेको प्रदेश नम्बर १ प्रतियोगिताको तेस्रो खेल खेल्दैछ । पहिलो खेल पुलिससँग गुमाएको कर्णालीले दोस्रोमा त्रिभुवन आर्मी क्लब र तेस्रो खेलमा प्रदेश नम्बर २ सँग पराजित भएको थियो ।

प्रदेश १ पहिलो खेलमा आमीं र दोस्रो खेलमा पुलिससँग पराजित भएको थियो । समुह बीमा प्रदेश १ भने २ खेलमा अंकबिहीन हुँदै चौथो र कर्णाली पाँचौ स्थानमा छन् ।

मुलपानी मैदानमा हुने खेलमा एपीएफ र गण्डकी प्रदेशबीच प्रतिस्पर्धा हुँदैछ । अघिल्लो चरण प्रवेशको बलियो सम्भावना बनाएको एपएिफले प्रतियोगितामा दोस्रो खेल खेल्न लागेको गण्डकीसँग प्रतिस्पर्धा गर्न लागेको हो । गण्डकी पहिलो खेलमा प्रदेश नम्बर ३ सँग पराजित भएको थियो ।