काठमाडौं– प्रमुख प्रतिपक्ष दल नेपाली काँग्रेसका सभापति शेरबहादुर देउवाले सरकार संघीयताको पक्षमा नरहेको बताएका छन् । सभापति देउवाले सरकारले संघीयताको अपमान हुने गरी बजेट ल्याएको भन्दै आपत्ति जनाए ।

बिहीबार पार्टीद्वारा काठमाडौंमा आयोजित कार्यक्रममा उनले सिंहदरबारको अधिकार प्रदेश सरकारलाई दिनुपर्नेमा ओली सरकारले कटौति गरिरहेको आरोप पनि लगाए । प्रदेश सरकारका मुख्यमन्त्रीहरुले नै संघीय सरकारले अधिकार नदिएको गुनासो गरिरहेको सभापति देउवाले बताए ।

सभापति देउवाले संघीयता र लोकतन्त्रलाई कमजोर बनाउने प्रयास भइरहे सरकारलाई हटाउने गरी आन्दोलन गर्नुपर्ने अवस्था आउने भन्दै त्यसका लागि तयार रहन पार्टीका नेता, कार्यकर्तालाई निर्देशन दिए ।

सभापति देउवाले लोकतन्त्रलाई आत्मासात नगरेकाले काँग्रेसले राजतन्त्र हटाएको स्मरण गराउँदै प्रजातन्त्र र राजतन्त्रसँगै हिँडने अवस्था नभएपछि राजतन्त्र हटाइएको र ओली सरकारले पनि लोकतन्त्रको विरोध गरिरहे हटाउने चेतावनी दिए ।