काठमाडौँ– बागमती प्रदेशका श्रम रोजगार तथा यातायात मन्त्री घनश्याम दाहालले यातायात कार्यालयमा जनशक्ति अभावका कारण हुने ढिलासुस्तीलाई अन्त्य गर्ने बताएका छन्।

बिहीबार ललितपुरको एकान्तकुनास्थित यातायात कार्यालय अनुगमन गर्दै मन्त्री दाहालले यातायात कार्यालयमा दक्ष जनशक्तिको व्यवस्था गर्दै ढिलासुस्तीलाई अन्त्य गर्ने बताएका हुन।

अनुगमनका क्रममा सेवालाई चुस्तदुरुस्त बनाउन निर्देशन दिदै आवश्यक सुधारको प्रयास मन्त्रालयले गर्ने उनको भनाई छ।

मन्त्री दाहालले यातायातमा बिचौलियालाई अन्त्य गर्दै सेटिङ रोक्ने भन्दै यस्ता कार्य रोक्न निर्देशन दिए। उनले अहिले पनि कागजी झण्झट देखिएको भन्दै त्यसलाई अन्त्य गर्नका लागि देखिएको कानूनी जटिलता हटाइने दावी गरे।

अनुगमनका क्रममा मन्त्री दाहालले सेवाग्राहीसँग छलफल गर्दै देखिएका समस्याका बारेमा जानकारी र्लिएका थिए। सेवाग्राहीले घन्टौँ लाइन बस्दा पनि सहज रुपमा सेवा नपाएको भन्दै आक्रोश पोखेका थिए।